真正落床既時候，個頭好痛，係唔係夾硬訓得太多呢響屋企消磨到１２點幾先至出門口，仲約左 REBE １點響銅鑼灣等添，遲就遲梗架喇，好彩佢都唔係一個準時既人（笑），入場之前響附近食左少少野先，係唔係銅鑼灣真係巴閉Ｄ既呢，茶餐廳都真係夠膽死連水都無杯架喎，做乜啫依家，唔飲你既飲品會渴死架，真係咪駛旨意我再入去囉，臨入場買飛，聽佢地講起，原來花展只係開始左兩三日，我即時暗叫不妙啦，肯定多人到想死囉，唉～鬼叫應承左出黎咩
人真係多到不得了，想無人遮住你想影既野真係唔容易，就正如你想唔阻住人地個鏡頭都一樣好困難，既然入左黎，再艱難都要用心欣賞架啦，否則就白費左架喇，但係，見Ｄ花乾乾地，唔係太靚囉，佢地話上年靚Ｄ，今年感覺上佈置得好求其，我呢，兩年前都有黎過，而且仲係接近展期既尾聲，Ｄ花都靚過今次好多喎，我諗佢聽日或者後日會換過一批囉，不過就無我份了
每逢呢一類觀賞性既展覽，留意下入場人仕會用咩態度去睇個展覽，都係一個唔錯既活動，尤為深刻既有兩件事，第一係有個管理員唔該前唔該後咁勸告市民唔好坐響花圃上，呢個要求合理不過啦，偏偏有個父親將企左入花圃既小女孩拖番出黎，然後用不友善既眼神回禮，加上用不禮貌既語氣講「唔駛唔該」，我的確有衝動想搞清楚佢呢一切代表Ｄ乜野；而另一件事係，我親耳聽住有位媽媽對住個小女孩講「妳睇妳幾無膽，人地都坐左上花圃度喇」，啐～我無必要為兩位成年人想半點開脫理由，家陣我擺明就係鋤佢地，反正對小朋友，身教係最重要的，或者好不幸地當你小朋友既時候無人教，但係我眼前既呢個小朋友，有你呢個阿爸阿媽教喎，點解唔教呢？係唔係人地坐左，你唔坐就會好蝕底？人地話你聽偷野無人拉佢，你會唔會教下個仔女照學呢下？
逛完之後，一行４人去左天后某茶餐廳食少少野先歸家，估唔到果間野既油醬多又幾好食喎
![[Powered By MySQL]](/images/mysql-04.gif)
Copyright Notice: All entries are copyright (and the responsibility of) their respective authors.
